Мамандар қоғамдық көлік мәселесі де биыл түпкілікті шешіледі деп отыр Шымкентте биыл топырақ жолдардың барлығына шағал тас төселу жоспарланып отыр. Бұл туралы бүгін қалалық жолаушылар көлігі және автомобиль жолдары басқармасы өкілдерінің қатысуымен өткен брифингте айтылды.
Биыл Шымкентте жол құрылысы қыза түскен. Қазір бас-аяғы 415 шақырым жол жөнделіп жатыр. Олардың ішінде шаһардағы көлік кептелісін реттейтін 5 өткелдің құрылысы жүргізілуде. Дегенмен, мегаполисте әлі күнге дейін асфальт түгілі шағал тас төселмеген жолдар бар. Басқарма өкілдерінің сөзіне қарағанда қазір қаладағы топырақ жолдардың ұзындығы 112 шақырымды құрайды. Салаға жауаптылар жыл соңына дейін топырақ жолдардың мәселесін толығымен шешеміз деп уәде етті.
Абай Тұрханов, Шымкент қаласы ЖК және АЖ басқармасы басшысының орынбасары: «Тұрғындары 50 пайыз қоныстанған жолдарды есептегенде 112 шақырымды құрап отыр. Топырақ жолдарға шағал тас төсеу үшін бюджеттен қаржы бөлінген. Қазір екі мердігер мекеме жұмыс істеп жатыр».
Қоғамдық көлікке байланысты туындаған барлық мәселелер шешіледі деп отыр басқарма өкілдері. Бұдан былай бірін-бірі қайталайтын автобустар да алынып тасталады. Ал жыл соңына дейін ескірген қоғамдық көліктерді бірте-бірте алып тасталмақ.
Фариза Жандар
