Қазақстанда жеңілдетілген автокредит тәртібі бекітілді. Бұл туралы индустрия және инфрақұрылымдық даму министрі Қайырбек Өскенбаев мәлімдеді, деп хабарлайды Qazweek.kz ақпарат агенттігі Sputnik Қазақстан порталына сілтеме жасап.
“Иә, бүгін бекітілді. 10 миллион, 7 жылға 4 процентпен беріледі. 10 миллионнан жоғары соманы қоса беруге болады. Бірақ оны өз қалтаңыздан төлейсіз”, – деді Өскенбаев Sputnik Қазақстан тілшісіне берген сұхбатында.
Айта кетері, бұған дейін кредиттің үстінен қосылатын ақшаның шегі болады делінген.
Себебі жеңілдетілген автокредитпен бюджеттік көліктерді ғана рәсімдеуге жоспар болған.
Бағдарламаның негізгі шарттары: – кредит сомасы – 10 миллион теңге; – жылдық сыйықасы 4 процент; – мерзімі – 7 жыл.
Министрдің сөзіне қарағанда, көліктің бағасы кредит сомасынан жоғары болса, үстінен ақша қосуға болады. Нақты шектеу жоқ.
