Айтыскер ақын Ринат Зайытов Алматыдағы «Алатау» дәстүрлі өнер театрының директоры қызметіне тағайындалды, деп хабарлайды Qazweek.kz ақпарат агенттігі ҚазАқпарат порталына сілтеме жасап
«Ринат Зайытов «Алатау» дәстүрлі өнер театрының директоры қызметіне тағайындалып, бүгін ғана ұжымға таныстырылды», — деді ҚазАқпарат тілшісіне телефон арқылы театр директорының қабылдау бөлмесінен.
Ринат Зайытов 1983 жылы 17 қарашада Шығыс Қазақстан облысының Аягөз қаласында дүниеге келген.
Қазақтың айтыскер, суырып салма және жазба ақыны, драма актері, филолог.
М. Төлебаев атындағы музыка колледжін «Драмалық театр актері» мамандығы бойынша бітірген.
Семей мемлекеттік педагогикалық институтында филолог мамандығы бойынша білім алған.
Телевизиядағы алғашқы қадамы Семей қаласының жергілікті арнасындағы «ТТТ» әзіл-сықақ бағдарламасымен басталған.
Ол — 2001-2008 жылдары арасындағы аймақтық, республикалық және халықаралық айтыс додаларының жеңімпазы, 2008-2010 жылдары аралығында республикалык айтыстағы дүлдүл жеңімпазы.
Аягөз ауданының құрметті азаматы. «Астана қаласының дамуына қосқан үлесі үшін» медалімен марапатталған.
