Соңғы 3-4 аптада еліміздегі дәріханаларда қарапайым хирургиялық маскалардың таусылғаны белгілі. Qazweek.kz ақпарат агенттігі осы мәселені көтеріп, “Коронавирус тіркелмеген Қазақстанда маска да жоқ, бюджеттен бөлінген 2 млрд та жоқ” атты мақала жазған болатын. Қазақстанда халық жаппай маска сатып алмаса да, дәріханалардың ешбірінде жоқ, сонда ол маскалар қайда кетті? Дәріхана қызметкерлері олардың Қытайға жөнелтіліп жатқанын айтқан болатын.
Маска мәселесі ҚР Денсаулық министрі Біртановтың құлағына жетіп, министр өз жауабын айтты.
Оның сөзінше, сау адамға маска тағудың еш қажеті жоқ екен. Сонда министр Біртанов масканы мүлде қажет емес дегені ме?
https://www.facebook.com/196849530492917/posts/1421363281374863/?vh=e
Қазіргі таңда коронавирус Қазақстанда ресми тіркелген жоқ, алайда елімізде бұл вирустың жоқ екеніне халық сенбейді. Десек те, өлімге акеліп соқтыратын коронавирус Қазақстанда ресми тіркелсе не болмақ? Сол кезде де масканың мүлде қажеті жоқ деп отыра ма? Ауру айтып келмейді деген бар, бұл вирус халыққа қауіп төндірсе, қайтпек керек? Дәріханалардан қарапайым масканы таппай отырмыз, вирус шықса, күніміз не болмақ?
Әлде «қара нарықтың кәсіпкерлері» қарапайым халықтың денсаулығына түкіргені ме?
«Барлығы біздің бақылауымызда. Елімізде коронавирус тіркелген жағдайда онымен күресуге дайынбыз» деген ҚР Денсаулық министрлігі бір ғана масканы жеткізе алмай отырып қауіпті вирусқа қалай төтеп бермек? Біздің бар дайындығымыз осы ма?
Айта кетейік, коронавируспен күресу үшін бөлінген 2 миллиард ақшаның қайда кеткенін сұраған журналистерге министр Біртанов “Мен бұл сұраққа жауап бере алмаймын” деп айтқан болатын.
Біздің Үкімет Қазақстанға осындай қасірет келген жағдайда ғана қимылдай бастай ма?
Назерке Лабихан
