ҚР Индустрия және инфрақұрылымдық даму вице-министрі Марат Қарабаев жеңілдетілген авто несиенің талаптары туралы айтты, деп хабарлайды Qazweek.kz ақпарат агенттігі Orda.kz порталына сілтеме жасап.
Қарабаевтың айтуынша, көліктің құны 10 млн теңгеден көп болса, сатып алушы өз қаражатын қосады.
«Жеңілдікпен көлік алуға берілетін кредит лимиті – 10 млн теңге. Егер көлік құны 10 млн теңгеден жоғары болса, қалған қаржыны сатып алушы өз қалтасынан төлейді. Жеңілдетілген кредит көліктің маркасына қарамастан, барлық көлікке беріледі. Ал кредиттің 10 млн теңгеге дейін берілетін себебі, мәселен, 25 млн-ға көлік алуға қаржылық мүмкіндігі бар адам жеңілдетілген кредитсіз-ақ көлік сатып ала алады емес пе?» деді вице-министр.
Еске салсақ, кеше премьер-министрдің бірінші орынбасары Роман Скляр алғашқы жарнасыз, 7 жылға 4 пайызбен жеңілдтілген авто несие алуға болатыны туралы айтқан. Осы мақсатта «Жасыл Даму» компаниясы 10 млрд теңге бөлуге ниетті.
