Қазіргі таңда киелі Әулиеата жерінде білім саласына да айрықша басымдық берілген. Соның жарқын дәлелі ретінде – аталған саланы қаржыландыруға 218,5 миллиард теңге қарастырылды. Қазір аймақтағы 3-6 жас аралығындағы балаларды мектепке дейінгі ұйымдармен қамту – 100 пайызға, 1-6 жастағы балғындарды – 91,5 пайызға, қосымша білім берумен қамту 83,7 пайызға орындалды.
Қазақстан Республикасының Президенті Қасым-Жомарт Тоқаевтың тапсырмасының негізінде өңіріміздегі 44 592 педагогтің еңбекақысын 25 пайызға ұлғайтуға 35,1 миллиард теңге қарастырылса, 2022 жылы бұл 59,6 миллиард теңгеге жетпек. Сондай-ақ жыл басынан 11,1 миллиард теңгеге 23 нысанның құрылысы басталып, жаңа оқу жылында 1 716 орындық 5 мектеп пайдалануға берілсе, 1 380 орындық тағы 3 мектептің құрылысы жыл соңына дейін аяқталады. Осының нәтижесінде 1 апатты, 3 үш ауысымды, 2 орын тапшылығы бар, тозығы жеткен 2 мектептің мәселесі шешіледі. Қалған 15 нысанның құрылысы келесі жылы аяқталады.
Облыс орталығында тұңғыш рет «Оқушылар сарайының» құрылысы жүргізіліп жатыр. Бұдан бөлек 13 мектеп күрделі жөндеуден өтті, 2 мектеп және 1 білім басқармасына қарасты мекеменің күрделі жөндеу жұмыстары жыл соңына дейін аяқталады деп жоспарлануда.
Балалардың қауіпсіздігін қамтамасыз ету мақсатында барлық 443 мектеп бейнебақылау камераларымен толық қамтамасыз етілген.
Жаңа оқу жылына дейін 370 мектепке дабыл түймесі, 85 мектепке турникет орнатылады. Тараз қаласындағы 60 мектеп жедел басқару орталығына қосылды.
Өңірдегі тек білім саласында ғана емес, Мәдениет саласында 139 ауылдық елді мекенде 208 цифрландырылған ақпараттық және коворкинг орталықтары ашылды. Сондай-ақ мәдениет нысандарын арттыру мақсатында «Ауыл – ел бесігі» арнайы жобасы аясында 4 нысанның және «Жұмыспен қамтудың Жол картасы» аясында 1 нысанның құрылысы жүргізіліп жатыр.
Жуырда туризмді дамыту мақсатында өңірлік бағдарлама қабылданатын болады. Шаһар тұрғындарының алаңсыз демалуы үшін «Тектұрмас» этнотарихи кешені қайта қалпына келтірілді. Бұдан бөлек, жеке инвестиция есебінен «Қаралма» тау-шаңғы кешені мен «Көксай» этнотарихи кешенінің құрылысы жүргізіліп жатыр.
