Мәжіліс төрағасы Нұрлан Нығматулин төрағалығымен палата бюросының отырысы өтті. Депутаттар жалпы отырыстың күн тәртібін бекітті, деп хаюбарлайды Qazweek.kz ақпарат агенттігі, КазТаг порталына сілтеме жасап.
Бюро отырысында бала құқығын қорғау мәселелеріне қатысты заң жобасын бірінші оқылымда қарау ұсынылды. Осы құжат депутаттар бастамасымен әзірленіп отыр.
«Заң жобасы балалар мүддесі үшін заңнаманы жетілдіруді көздейді. Сондай-ақ, БҰҰ Бала құқығы жөніндегі комитет ұсынымын іске асыру мақсатында әзірленді. «Балаға мейірімді Қазақстан» атты екі халықаралық конференция қорытындысы бойынша дайындалған ұсынымдар ескерілді», — делінген ресми хабарламада.
Осы құжат аясында қылмыстық, әкімшілік құқықбұзушылық туралы және еңбек кодексіне, сондай-ақ, тағы бірқатар заң жобасына түзетулер енгізу ұсынылады.
Бұдан бөлек, алдағы жалпы отырыста «Қазақстан Республикасының кейбір заңнамалық актілеріне мемлекеттік басқару деңгейлері арасында өкілеттікті қайта бөлу мәселелері бойынша өзгерістер мен толықтырулар енгізу туралы» заң жобасын екінші оқылымда қарау ұсынылды.
Фото: ашық дереккөзден
