Мессенджерлерде тағы да фейк ақпарат тарап жатыр. Қазнетте медициналық маскалардағы моргеллон құрттары туралы хабарламалар көп. Кейбір пайдаланушы жұмбақ тіршілік иелері денсаулыққа қалпына келмейтін зиян келтіруі мүмкін және олармен күресу керек деп санайды. Желіде мұны қалай жасау керегі туралы ұсыныстар бар, бірақ сипатталған әдістер көмектеспес бұрын, зиян келтіруі ықтимал, — деп хабарлайды StopFake.
Фактчекерлер де, ҚР Денсаулық сақтау министрлігінің өкілдері де бетперделердегі және ПТР-тестілеу жиынтықтарындағы бірде моргеллондар, бірде нано-боттар деп аталатын құрттар туралы хабарламаларды бірнеше рет жоққа шығарған болатын. Дегенмен, Қазнеттің кейбір пайдаланушысы осы теорияны одан әрі дамытып, тіпті жоқ құрттардан қалай құтылу керегі туралы кеңестерді бөлісіп жүр. Олар бетперде таққандардың барлығына сутегінің асқын тотығын ішуді ұсынады.
Бірақ мұндай «ем» денсаулыққа көмектесуден гөрі зиянын тигізуі мүмкін.
«Сутегінің асқын тотығын мүлдем ішуге болмайды. Бұл өлімге әкелуі мүмкін. Заттың 3 миллилитрі өлімге апаруы ықтимал деп саналады. Сутектің асқын тотығы шырышты қабықтарға түсіп, сілтілердің әсерінен болған күйіктерге ұқсас деструктивті өзгерістерге әкелуі мүмкін.
Оның үстіне, моргеллондардың әсерінен «емделудің» қажеті жоқ, өйткені бұл құрттардың болуы, сондай-ақ олар тудыратын аурулар дәлелденбеген. Бұл дерт аурулардың халықаралық жіктеуішіне енгізілмеген, өйткені көптеген ғалымның пікірінше, Моргеллон ауруы — галлюцинация және дерматоз сандырақ деп аталатын психиатриялық аурудың немесе басқа психикалық бұзылыстың белгісі», — делінген StopFake сайтында.
