Жамбыл облысында түтінге тұншығып қаза тапқан бес баланың туыстары көпшіліктен жараның бетін тырнай бермеуді өтінеді. «Ешкімге кінә тақпаймыз, болар іс болды, оған көндігуден басқа амалымыз жоқ» деген олар, бұдан былай бұл мәселені қозғамауды сұрайды.
Қайғы жұтқан отбасы КТК телеарнасы арқылы бүкіл елге үндеу тастады.
Болған жағдай ел тұрғындарының қабырғасын қайыстырғаны жасырын емес. Үш күннен бері қайғыдан қан жұтқан отбасыға жер-жерден көңіл айтылып жатыр. Бірақ оқыс оқиғаға анасын, қала берді әкімдікті айыптаудан мезі болдық дейді қаза тапқан балалардың туыстары. Тіпті кейбірі жалған мәлімет таратуға кіріскен деп күйінеді. Сондықтан біздің арна арқылы ақпаратты бұрмалаушыларға үндеу тастады.
«Әлеуметтік желідегі анау-мынау деп, сан-саққа жүгіртіп, қитұрқы іс жасап жатқандарға да айтарым: Тоқтатыңдар, осымен қоя қойыңдар. Біз соның бәрін естіген сайын жүрегіміз сыздап жатыр. Бізге берген көмектеріңіз сол болсын», — дейді марқұм балалардың туысы Саидмұхаммед Әбдумәліков.
Қаралы отбасының уәжін жеткізген Саидмұхаммед Әбдумәліков: «Бұл біздің бірінші әрі соңғы мәлімдемеміз болса» — дейді. «Бұдан былай ешкім бізді мазаламағаны, жағдайға түсінікпен қарағаны дұрыс» деген пікірде. Сондай-ақ ол өрттің неден шыққанын айтып берді.
«Өрттің болғаны – балалар ойнап сіріңкемен от жаққан. Содан болып тұр ғой. Басқа – электр тоқ, газ, буржуйка деп, біреулер шығып жатыр. Оның бәрі өтірік», — дейді марқұм балалардың туысы Саидмұхаммед Әбдумәліков.
Қайғылы жағдай болған үйдің ауласы лентамен қоршалып, далада полицейлер күзетіп тұр. Өйткені пәтердегі өрттің неден шыққанын анықтау үшін іште тергеушілер үзіліссіз жұмыс істеп жатыр. Тек осы подъездің тұрғындарына ғана үйіне кіруге рұқсат.
Ал белгілі болғаны, оқыс оқиға болған баспанаға бес баласынан айырылған отбасы оралмайды. Себебі, осы жерде тұру қайғыдан қан жұтқан жандарға ауыр соғатынын ескерген туыстары, ерлі-зайыптыны жаңа үйге қоныстандыруды ұйғарыпты.
Қаралы отбасы: «Бізге моральдық, психологиялық көмек болмаса, қаржылай қолдау қажет емес» — дейді. Дегенмен жылу жинауға ниет білдірген көпшілікке алғысын білдірді. Ал өздерінің де ерлі-зайыптыға баспана әперуге мүмкіндігі бар екен. Бірақ сонда да жас отбасыға демеушілер көмегімен пәтер берілетін болыпты.
«Өңірдегі мемлекеттік қызметкерлер бір күндік жалақысын жолдайтын болды. Ата-анасына демеушілер есебінен үш бөлмелі пәтер берілді. Сарысу ауданының кәсіпкерлері баспанаға қажет жиһаз бен техниканы алып берді. Түрлі мемлекеттік емес қорлар мен 3 млн. теңгеден астам қаржы жиналып, материалдық көмек көрсетілді», — деді Жамбыл облысы әкімінің баспасөз хатшысы Олжас Сайлаубекұлы.
Үш күн бұрын Жаңатастағы көп қабатты үйдің бірінде өрт болып, үлкені 6 жаста, кенжесі 7 айлық бес бала түтінге тұншығып көз жұмған. Әкесі жұмыста, анасы дүкенге шығып кеткенде балар үйде қалған.
Полицейлердің алғашқы болжамы – от сіріңкеден тұтанған. Қазір өрт қауіпсіздік ережелерін сақтамау бабы бойынша іс жүргізіліп жатыр. Сенбі күні марқұмдар жер қойнына тапсырылды. Ал бес перзентінен бірдей айырылған ерлі-зайыпты Үшарал ауылындағы туыстарының үйінде. Олар психологтардың жіті бақылауында.
