Қашықтан оқыту кезінде Сыр еліне Үкімет резерві есебінен бөлінген қаржыға компьютерлер техникалар алынуда. Қыркүйек-қазан айында облысқа 13489 дана компьютерлік техникалар жеткізіліп, оқушыларға таратылған. Ал, бүгін 9381 электронды құрылғылар жеткізіліп, мектеп оқушыларына табысталады.
Қызылорда облыстық білім басқармасының басшысы Ақзира Қасымованың айтуынша, техникалар ең алдымен әлеуметтік аз қамтылған отбасылардың балалары, ерекше жағдайда үйден білім алатын және көпбалалы отбасының балаларына беріледі.
Айта кету керек, ертең мектеп оқушылары І оқу тоқсанын аяқтайды. Қашықтан оқыту кезінде ІІ тоқсан 16 қарашада басталады. Яғни оқушылар үшін 10 күн демалыс беріледі. ІІ оқу тоқсанында 1-5 сыныптарда 2720 кезекші топ ашылып, онда 39357 бала оқиды деп күтіліп отыр.
Ал, бала саны 300-ден аспайтын 121 мектепте 19267 бала оқытылмақ. Оқушылардың басым бөлігі қашықтан оқыту форматында білім алады.
