Бүгін Қызылорда облысының әкімі Гүлшара Әбдіқалықова қаладағы қайта жаңғыртудан өткен «Сыр Ана» алаңының жұмысымен танысты. Абаттандыру жұмыстарын «Техоснастка-Ремсервис» ЖШС жүргізген. Алаңда жаяу жүргіншілер жолы, спорттық-ойын алаңы және 2 су бұрқақ орналастырылған.
Айта кетейік, «Сыр-Ана» монументі – Қызылорда өңірінің тарихи ерекшеліктерін айшықтайтын Сырдария өзенінің жағасында орналасқан монумент.
Монументтің биіктігі – 39 метр. Ескерткіш пішіні биіктеген сайын өз діңгегінің айналасында оралып, әсем бейне қалыптастырады. Жоғарғы жағы қазақ әйелінің бейнесін айшықтайтын сәукелеге ұқсас жасалған. Сәукеле бейнесіндегі мұнара басын жайғалған күріш бейнесіндегі бөлшек аяқтайды. Қызылорда облысы Қазақ елін күрішпен қамтамасыз етеді. Сондықтан, күріш – Қызылорда облысының белгісі. Монументтің самал желмен бұйраланған етегі Сырдарияның бұйра толқындарын бейнелейді. Сырдария өзені облыс шаруашылығында маңызды рөл ойнайды.
