Биыл Қызылорда облысында елді мекендердің экологиялық жағдайын және
суармалы сумен қамтамасыз етілуін жақсарту мақсатында 12 каналға су шаруашылығы
жұмыстарын жүргізуге қаржы бөлінді. Бұл туралы Қызылорда облыстық табиғи ресурстар
және табиғат пайдалануды реттеу басқармасының басшысы Бауыржан Шәменов
мәлімдеді.
«Өңірде облыстық бюджеттен 8 каналға және «Жұмыспен қамтудың жол картасы
– 2020» бағдарламасы аясында 4 каналға қаржы қаралды. Бүгінгі күні, 4 каналдың тазалау
жұмыстары аяқталды, ал қалған 8 каналға жөндеу жұмыстары жүргізілуде», – дейді
Бауыржан Серікұлы.
Басқарма басшысы атап өткендей, өңірде полигон құрылысына дайын жобалар
бар көрінеді.
«Облыста мемлекеттік-жекешелік әріптестік аясында қалдықтарды сұрыптау
кешені мен полигонның құрылысы аяқталды. Кешенде жылына 60 мың тонна қалдық
сұрыпталады. Бұған қоса, облыста жыл басынан бері жинақталған 58,5 мың тонна
қалдықтың 10,5 мың тоннасы өңделді», – дейді Б. Шәменов.
