Қызылорда облысында агроөнеркәсіптіктік кешен саласында инновациялық жобаларды жүзеге асыру бағдарламасы аясында бірқатар жобалар іске асырылуда.
Бағдарламаның негізгі мақсаты – ауыл шаруашылығы саласының өндірісіне инновациялық тәжірибені енгізу және кеңінен тарату болып табылады.
Осы ретте, ағымдағы жылы «Қазақ қайта өңдеу және тағам өнеркәсіптері ғылыми-зерттеу институты» ЖШС-нің ғалымдары Қазалы ауданындағы «РЗА-Нан» ЖШС-де күріш ұнын нан-тоқаш өнімдерінде қолдану жөніндегі өз жұмыстарын бастап кетті.
Жоба барысында күріш ұнына зертханалық зерттеулер жүргізіліп, 10%, 15% және 20% күріш ұнтағы қосылған және гуар камедімен (тағамдық қоспа) байытылған нан үлгілері дайындалды.
Дайын нан үлгілері бойынша сала мамандары мен қарапайым тұрғындар дегустация жасап, өздерінің оң бағаларын берді.
– Күріш ұнын қосу арқылы дайындалған нан өнімдерінің өзіндік құны төмендейді. Бұл тиісінше нан бағасына айтарлықтай оң әсерін береді деп ойлаймыз. Бұл өз кезегінде, нан-тоқаш өнімдерін дайындауда, өңірімізде өндірілетін негізгі дақыл күріш салысын өңдеу барысында алынатын күріш ұнын таза бидай ұнымен қосып пайдалану арқылы өнімді терең өңдеу және азық-түлік өнімдері өндірісінің дамуына септігін тигізеді деп санаймыз, – делінген хабарламада.
