Арал ауданындағы индустриалды аймағында «Qazaq Camel» ЖШС-нің түйе сүтін өңдеп, одан құрғақ сүт өндіретін цехының құрылысы басталды.
Арал қаласындағы №1 республикалық маңызы бар индустриялық аймағында орын тепкен цех туралы «Qazaq Camel» ЖШС-нің директоры, «Түйе сүтінен құрғақ ұнтақ дайындау цехі» жобасының жетекшісі Нұғырбек Абулғазин аймақта алғашқы рет қолға алынып отырған жоба жайында әңгімелеп берді.
Оның айтуынша, жылына 130 тоннадан астам түйе сүтінен құрғақ қоспалар өндіруге қауқарлы цехтың құрылыс жұмыстары ағымдағы жылдың соңында аяқталады деп жоспарлануда. Жоба іске қосылғанда 25 адам жұмыспен қамтылатын болады. Мұнда әзірленген дайын өнімдер республика нарығынан бөлек, алыс-жақын шет елдерге экспортталмақ.
Өңірлік индустрияландыру картасына енгізілген, жалпы құны 1,5 млрд теңгені құрайтын цехтың құрылысын жергілікті «Арал құрылысы» ЖШС қолға алып отыр.
