Жалағаш ауданында соңғы 6 жылда 1 мектеп салынса, 6 мектеп күрделі жөндеуден өткізілді. Бүгінгі таңда М.Шәменов ауылдық округінде 140 орындық жаңа мектеп ғимаратының құрылысы жүргізілуде.
Биылғы жылы аудандағы салынғалы бері күрделі жөндеу жұмыстары жүргізілмеген Аққыр ауылдық округіндегі №188 орта мектеп ғимаратына, Мақпалкөл ауылдық округіндегі Ә.Оңалбеков атындағы №117 орта мектеп ғимаратына күрделі жөндеу жұмыстары жүргізіледі.
Жалпы ауданда 36 мектепке дейінгі білім беру ұйымы бар. Олардың ішінде 10 мемлекеттік балабақша, 18 жеке балабақша және 8 мектеп жанынан ашылған шағын орталық жұмыс істейді. Аталған мектепке дейінгі білім беру ұйымдары 2156 баланы қамтып отыр.
Жалағаш ауданында 3 пен 6 жас аралығындағы балаларды мектепке дейінгі тәрбиемен және оқытумен қамту көрсеткішін 100 пайызға жеткізу міндеттемесі толығымен орындалды.
Биылғы жылы «Жұмыспен қамтудың 2020-2021 жылдарға арналған жол картасы» аясында аудан орталығындағы бірнеше жылдан бері бос тұрған ескі емхана ғимаратын балабақша етіп қайта жаңғырту жұмыстары жүргізілмек.
