Медицина қызметкерлерінің кәсіби мерекесіне орай ШҚО әкімі Даниал Ахметов осы салада еңбек етіп, халықтың алғысын арқалап жүрген ақ желеңді абзал жандарды құттықтап, бірқатар дәрігерге жаңа пәтердің кілтін табыс етті.
– Халыққа ең пайдалы мамандық иесі болса, ол сөзсіз дәрігерлер. Сіздер халыққа үміт сыйлайсыздар. Біз сіздерге сенеміз және сіздермен мақтанамыз. Алдағы 3-4 жылда сіздердің білім-біліктеріңіз жаңа деңгейге көтерілетін болады. Соның арқасында елімізден ғана емес, алыс-жақын шетелдерден мыңдаған емделуші қызметтеріңізге жүгінеді. Өйткені сіздердің дамуға деген талпыныстарыңыз керемет. Сіздерге денсаулық пен бақыт тілеймін, – деді аймақ басшысы облыстық драма театрында өткен мерекелік жиында.
Салтанатты шара барысында еңбегімен көзге түсіп, қатарынан озып жүрген бірсыпыра медицина қызметкері облыс әкімінің қолынан пәтер кілттерін, Алғыс хаттар мен Құрмет грамоталарын алды. Солардың ішінде жаңа пәтерге ие болғандар: А.Лахно, Е.Оспанов, А.Мейірманова, Н.Жанпейісов, М.Көксегенов, Ш.Мақашева, Б.Таймасова, А.Михайлова, С.Слямова, Е.Байғаранов және т.б.
Сондай-ақ «Senim» денсаулық сақтау жүйесі қызметкерлерінің салалық кәсіподағы облыстық филиалының төрағасы Руслан Еңсебаев биылғы Жастар жылында жас мамандарға екі пәтер мен алты қаржылай сертификат сыйлады.
Қуан Сейіт
