Қызылорда облысында күріш жинау науқаны аяқталды. Биыл диқандар 89,5 мың гектар жерге күріш егіп, 551 мың тонна өнім жинады. Астықтың шығымдылығы гектарына 61,8 центнерді құрады.
«Диқандар ауыл шаруашылығы дақылдарын агротехникалық талаптарға сай егіп, күтіп-баптау жұмыстарын өз мерзімінде жүргізді. Қазіргі таңда егін жинау науқаны толығымен аяқталды. Дала еңбеккерлері су тапшылығына қарамастан егілген егістен жоғары өнім алды», – дейді Қызылорда облыстық ауыл шаруашылығы басқармасы басшысы Шахмардан Қойшыбаев.
