Кешеден бері Зайсандағы 42 Қытай азаматына байланысты жергілікті тұрғындардың бас көтеруі болып жатыр. Әлем халқын дүрліктірген жұқпалы ауру коронавирустың тарап кетуіне алаңдаған халық биліктен бұл мәселені шешуді талап етуде. Ал бүгін Youtube әлеуметтік желісінде Зайсан ауданының әуежайына ұшақпен арнайы жасақ алып келгендігі туралы видео тарады. Видеодан 2 әскери көлікті көруге болады. Сондай-ақ, әскери киім киген адамдар мен арнайы жәшіктерді тасып жатқандығын анық байқай аламыз. Билік өкілдерінің Қордайдағы оқиғаның қайталануының алдын алу шаралары ма, немесе қандай жағдаймен арнайы жасақтың келгендігі әзірше белгісіз.
Естеріңізге сала кетсек, Зайсан халқы 19 ақпаннан бері Қытай Халық Республикасынан келген адамдарды 14 күн бойы өңірлік провизорлық стационарда оқшаулау шарасына наразылық білдіріп, бас көтерді.
