Қазақ дәрігер Бахаргүл Бүдәш Ухань ауруханасында би билеп, коронавирустан емделіп жатқан науқастарға мерекелік көңіл-күй сыйлады, деп жазады Qazweek.kz ақпарат агенттігі sputniknews.kz порталына сілтеме жасап.
Видеоны қазақ дәрігерінің досы және әріптесі жолдады. Айтуынша, көңілді видео коронавирус індеті тараған Ухань қаласының Фан Цан ауруханасында түсірілген. Аурухана дәлізінің қақ ортасында «Қара жорға» биін билеген дәрігердің есімі – Бахаргүл Бүдәш. 35 жастағы қандасымыз сегіз жылдан астам хирург болып жұмыс істейді.
«Өте мықты дәрігер-хирург. Қытай әр аймақтан білікті дәрігерлерді жинап, Уханьдағы ауруханаларға жіберген. Арасында осы кісі де бар», – дейді видеоны жолдаған досы.
Айтуынша, ақ халаттылар аурудан қажып, ұнжырғасы түскен пациенттердің көңіл-күйін көтермек болған. Осылайша, әр ұлттың ән-биін қойып, шағын концерт ұйымдастырған. Он шақты ұлт өкілі би билепті. Қазақтың атынан Бахаргүл Бүдәш шығып, «Қара жорға» билеген.
