Алматы облысында жол апаты болып, үш бірдей адам көз жұмды, деп хабарлайды Qazweek.kz ақпарат агенттігі Stan.kz сайтының дерегіне сүйеніп.
Жантүршігерлік жол апаты бүгін түскі уақытта болды. Жол-көлік оқиғасы болған жерде түсірілген суреттер мен видеолар Instagram желісінде жарияланды.
Алматы облысының полиция департаменті жол-көлік оқиғасы салдарынан үш адамның көз жұмғанын хабарлады.
«Жол-көлік оқиғасы Алматы – Көкпек – Көктал автожолынан 40 километр қашықтықта болды. Осы жерде Toyota Highlander мен 21014 лада соқтығысқан. Төрт адам әртүрлі жарақатпен Есік ауруханасына жеткізіліп, тағы үш адам көз жұмды», – деді баспасөз қызметіндегілер.
Зиян шеккендердің арасында екі бала бар. Тиісті сараптамалар тағайындалып, сотқа дейінгі тергеу жұмыстары басталды.
